Монгол дахь тусгай хэрэгцээ шаардлагатай хүүхдүүдийг дэмжихийн тулд дан ганц боловсролын салбар бус эрүүл мэнд, сэтгэл судлалын салбарын хамтын ажиллагаа нэн чухал байдаг. Иймээс 2017 оны 9 сарын 13-нд Нагояа Их сургуулийн профессор Номура Кэнжигийн хамт АШУҮИС-ийн Сэтгэцийн эрүүл мэндийн тэнхимийн багш нартай уулзаж, хамтран ажиллах боломж, чиглэлийн талаар санал солилцож, хамтарсан сургалт, судалгааны ажлуудыг хийхээр ярилцсан.
Энэхүү уулзалтын дараа 2018 оны 03 сарын 6-нд “Монгол Японы хүүхдийн сэтгэцийн эрүүл мэндийн асуудал” сэдэвтэй олон улсын зөвлөгөөнийг Хүүхдийн хөгжлийг дэмжих төв амжилттай зохион байгууллаа. Зөвлөгөөнд МУБИС, Нагоя Их сургууль, Сэтгэцийн эрүүл мэндийн үндэсний төв, АШУҮИС-ийн Сэтгэцийн эрүүл мэндийн тэнхим оролцож нийт 6 илтгэл хэлэлцүүлсэн. Нагоя их сургуулиас профессор Номура Кенжи болон Канеко Хитоши нар Япон дахь хүүхдийн сэтгэцийн эрүүл мэндийн талаар илтгэл хэлэлцүүлж оролцлоо. Мөн АШУҮИС-ийн Сэтгэцийн эрүүл мэндийн тэнхимийн эрхлэгч З.Хишигсүрэн, Сэтгэцийн эрүүл мэндийн үндэсний төвийн дэд захирал Б.Баярмаа, мөн төвийн эмч, сэтгэл зүйч нар илтгэл хэлэлцүүлж оролцлоо. Зөвлөгөөний дараа санал дүгнэлт, хэлэлцүүлэг явагдаж 2 орны төдийгүй, боловсрол, эрүүл мэндийн салбар дундын хамтын ажиллагааг дээшлүүлэхэд чухал ач холбогдолтой зөвлөгөөн боллоо.